Sozietate-Kontratua:

Lan-sozietateen kudeaketan duen garrantzia

Sozietate-kontratuak edo bazkideen itunak sozietatearen funtzionamendua eta bazkideen arteko harremana arautzeko aukera ematen du, eta, aldi berean, gatazka-egoerak saihesten ditu.

Tresna juridiko bat da, kapital soziala bazkide batena baino gehiagorena duten merkataritza-sozietate guztiei aplika dakiekeena, eta, beraz, garrantzi berezia hartzen du Lan-Sozietatean.

Mende honen hasieratik, ASLEk tresna bat garatu du bere enpresa elkartuen artean hautemandako behar bati erantzuteko: bazkideen belaunaldi-aldaketa bermatuko duen tresna bat sortzea. Tresna horren helburua da Lan Sozietatearen figura sendotzea eta Sozietatearen eta bazkidearen arteko interesen oreka ziurtatzea. Ikuspegi horren bidez, erakundeen jarraitutasuna eta egonkortasuna indartu nahi dira, belaunaldien arteko trantsizioa eta gizartearen epe luzeko iraunkortasuna bultzatuko dituen esparru juridikoa sustatuz.

Gaur egun, ASLEko kide diren enpresa askok Sozietate Kontratua sinatu dute, horrela denboran jarraipena eta bake soziala bermatuz. Era berean, Sozietate Kontratuari atxikitako bazkide langileei beren itxaropenak betetzen zaizkie lan-bizitzan zehar eta lan-bizitzaren amaieran. Ildo horretan, ehunka pertsonak erretiroa hartzea ahalbidetu du, eta bide eman die belaunaldi berriei, euren ondarea besarkatu eta proiektu sozio-enpresarialarekin eta horren ondoriozko enpleguarekin jarraitzen dutenei.

Sozietate-kontratua, Estatutu Sozialak ez bezala, dokumentu pribatua da, borondatezkoa, eta eraginkortasuna du alderdi sinatzaileen artean. Horregatik, ahalegintzen gara bazkide langileen % 100ek bat egin dezaten, nahiz eta haren edukietako batzuk Estatutu Sozialetara eraman daitezkeen (adibidez, eskualdaketaren prezioa).

Kontratua tresna bizia da, aldian-aldian berrikusi eta eguneratu beharrekoa, enpresaren behar eta errealitate aldakorrekin bat etortzeko.

Lan-sozietatearen esparruan, tresna juridiko bat da, eta honako hau du helburu nagusi: akzioak/partaidetzak eskualdatzeko prozedura praktiko eta koherente bat ezartzea, bazkideak berritzea/ordezkatzea eta onuraren tratamendua errazteko.

Lan-sozietatean bazkide izatea kontratu mugagabea duen langilearen izaerari lotuta dago nagusiki, klase orokorreko bazkideari kalterik egin gabe; horregatik, bazkide baten lan-harremana amaitzen denean, bazkideak bere akzioak transmititu beharko ditu plantilla birsortzeko eta, ahal den neurrian, enpleguari eusteko edo handitzeko; lan- eta sozietate-bizitzaren zikloa. Azken finean, enpresa da hurrengo belaunaldientzako ondarea.

Hala, lan-bizitzan zehar, bazkideak sozietatearen kudeaketan parte hartu ahal izango du, baita sortzen diren irabazietan ere, bere ahalegina ordaintzeko, aldi berean Sozietatea finantzarioki sendotzeko, inbertsio edo proiektu berriei ekiteko eta, azken batean, merkatuaren eskakizunak betetzeko aukera emango duen portzentaje batean. Eta, lan-harremana amaitu ondoren, bazkideak bere parte-hartzea alde batera uzten du, belaunaldi berriei transmititzeko, eta, hala, enpresaren iraunkortasuna ahalbidetzeko.

Laburbilduz, Sozietate Kontratuak enpresa bakoitzaren errealitatera egokitutako sistema praktiko bat ezartzen du. Sistema horrek, besteak beste, bazkideen sarrera eta irteera eraginkortasunez erregulatzea ahalbidetzen du, eta, horrela, uztartu egiten dira kargua uzten duen bazkideak bere garaian egindako ekarpenagatik konpentsazio bat lortzeko duen interes legitimoa eta enpresak bazkide berriak sartzea errazteko eta erakundeak Lan Sozietate gisa jarraitzea ziurtatzeko duen interes legitimoa.

Agian zuri ere interesatuko zaizu…